KOKBOROK KOKLOP- POEMS IN KOKBOROK/TRIPURA LANGUAGE BY BORENDRA LAL TRIPURA

Jabuini Saal - Tabokni Saal

By Borendra Lal Tripura

Jabuilai chini moyal-o toksa tokmului poongo

Chagoi paiya nungoi paiya khago khatungma fai-o.

Sumbur sub-oi dangdung tam-oi rachap-jalai-o

Sikalarok khatung-lai-oi sungui-jalai-o.

Taboklai nobar-o bana kakham bakhai-se man-o

Rachapni musupni kha failia; halama-se kufungni nai-o.

Khanalia aro toksa khorang, perlia khumbar kwchung

Palokgoi thang-kha sumbur supnani, palokgoi thangka daandung.

Silai khorang-se gurum-o taklai, khanago khobor kutung,

Befugo tama onglang-no bakha-se thuktuk thuktuk.

Hoogba haba khai-oi chalai-o jabui jabui-o chwng;

Birok charok kirima koroi hemfung thaangfung saichung.

Taboklai tokling gudama-se pwngjak,

Masa mifoor sial sukuru lam-o chomlai-oi tongjak;

Saichung laam hamkhai kathang fara fara

Bok-bai romjagoi waljak.

Paikha paikha chini jabuini

saal gaammarok paikha.

Nokha kuchukgo chumui uruktoi,

Bojangbo urukgoi thaangkha.

(March  8, 2011/ Dhaka)

Tipara-sa

By Borendra Lal Tripura

Tipara-sa chwng, Bangla Haa-ni Tipara-sa,

Maji koroini rwng-o kachok-jak passenger jaksa;

Bojang thaang-janai, boro kasok-nai

Mwngsa-nobo sia.

Jejang nobar sib-oi tilang,

Ojang kacholai-o,

Chwng utttar dokkhin sia.

Dangui Bura Dangui Buri rogoi kalangmani

Kokmwng lammwng chamwng chummwng

Chorok palokgoi paidong,

Chini, chorok kamagoi thaangdong.

          Tobo mwkturui baiya chini,

          Tobo chetar manlaiya.

Raijya kamakha rajatta kwmuk-kha,

Sangdari ongoi paikha,

Chwng, sangdari ongoi paikha.

Taboklai wakma koroini waksa chwng,

Tokma koroini toksa.

Chibuk manoibo sukgo chwgno,

Tokling manoibo baalo.

Masa mifur chibuk tokling

Chwngno keleng-oi tongjak,

Fer mankhalai baal-oi tilangnai,

Kathang monokgoi chanai;

Dukkho-ni kok sap-pwng sagoibo paiya-

          Tobo mwkturui baiya chini

          Tobo chetar manlaiya.

Sakni-bai sak-khais-e farijalai-o,

Esuk kha-sia!

Para bising-o tongoi chwng

Tokla kuchulai-o

Bini parago thangkha hinkhailai

Suibai-se jugukjago;

Kaisa-bai-bo paiya.

Tobo mwkturui baiya chini

          Tobo chetar manlaiya.

Thaang-oi tongni khai,

Torni lokni khai,

Kok khuksa khanadi-

Dangui Burani basa chwng,

Dangui Burini basa,

Bokni kokno romdi-

Takhuk bukhuk thamchidok chwng,

Kathajalai-oi matong-nai,

Taangni jora fai-kha-lai yagul ma-khol-lai-nai,

Chamwng jora fai-kha-lai baksa ma-cha-lai-nai,

Thuithai kalai-khai baksa thui-lai-di,

Haamthai kha-lai-khai haamdi.

Yak baksa romlaidi chorok –

Yak baksa romlaidi.

(March 10, 2011/Dhaka)