।। কুরুক্ষেত্রনি নাইরুঙমা ।।
বরেন্দ্র লাল ত্রিপুরা
চিনি বাখাসে কুরুক্ষেত্র
চবা মা-খাইলাইনায় অ হাপার’
গাম বায় হাময়া তাগলাইয়ই তংগ
অ হাপারনি কাচার’ (২)।
নিনি রথ সাকাগ’ বগই লাদি
নগফাংসান’ সারথী,
ভগবান কৃষ্ণন’ সারথী।
ব’সে নন’ লাম রনায়,
ব’সে নন’ বুজু সানায়;
বিনি পাঞ্চজঙ্গ শঙখ সুবই
হাঁইয়া-চায়ান’ নাশ খাইনায়। (২)
চিনি বাখাসে কুরু-পান্ডব
হস্তিনাপুরনি সিঙ্ঘাসন’
ধর্ম গানাঙ রাজানি বাগয়
অ সিংহাসন নাইসিংয়ই তংগ,
অর’ সব আচকনাই?
হায়ুঙমাগ’ ফাইমানি কৃষ্ণ
শঙখ চুরুইর’নায়
বিনি পাঞ্চ জঙগ শঙখ সুবই
ধর্মন’সে আচকরনায়। (ঐ)
-------------------------------
(২ সেপ্টেম্বর ২০২০/ঢাকা)
।। তৈমা-তৈসা তিপ্রাসা ।।
বরেন্দ্র লাল ত্রিপুরা
উয়ানসগয় নাইদি,
ও তৈমা-তৈসা তাঁ খে এসোক
কুথুকমা গরজামা অংখা !
ব' বসঙনি জত’ বায় কাথাগই তংগ,
আফাক অংগ, আফাক লাগ’, থানসা তংগ।
ওয়াতলক তৈসান’ব’ ব’ বাখাগ’ বকগ’,
হাকু তৈসান’ব’ ব’ লাম সঃগ’,
হলঙ তৈসাব’ ব’বায় হায়গজাগ’।
নাইদি তিপ্রাসা তাঁখে এসোক রামখা !
ফান করই, সাক করই, হালসে থাকখা !
ব’ রামসে রাম’, রামসে রাম’, রামসে রাম’
বরম করইজাখা!
তাখুক- বুখুক জাকসা বক, থানসা অংলাইয়া
বাকসা বুথুপ থুবয়া, য়াক রমলাইয়া,
বক খাকসে খাগ’, তাগসে তাগ’, কাচাল’ নরই হল’।
খাকতয় খাকতয় তাগলাইতয় তাগলাইতয়
নরলাইতয় নরলাইতয় খা-বাগজাগই থাংদং,
কক চাললাইনি নাইদং, লাম চাললাইনি নাইদং
হালক খাগজাকনি অংদং!
থুপসা অংখা ত্রিপুরা, থুপসা জমাতিয়া,
আর’ থুপসা রিয়াংফঙ, উসুই, নোয়াতিয়া,
দেববর্মা অংগই থাংখা থুপসা গরজামা,
হালাম হিনয় সাজাগ’থুপসা হামজাকমা,
আরাই খে বসঙনি মুঙ কুমুগই থাংখা।
তৈজালাঙ গরজামাব’ বাকজাগই থাংখায়
রানই-কসরই থাংগ’;
তৈমা-তৈসা গিরারকব’ বাকসা অংলাইখায়
তৈজালাঙ পগই ফাইয়।
উলাতা অনস্লতয় অনস্লতয়
চুঙ হা কাচাল’ সইখা; হালক চালই থাংখা।
তাবক জরা সফাইখা সাকাঙগ য়াপ্রি সঃনি,
থানসা অংগই সংসা অংগই,বসঙনি মুঙ চংনি।
(১ সেপ্টেম্বর ২০২০/ঢাকা)
--------------------------------
।। সালাই ।।
বরেন্দ্র লাল ত্রিপুরা
হায়ুঙমানি কুতুই-কাখান'
সালাই বায় চানায়ই নাইমান’।
বাখানি কুতুই-কাখান’ব’
সালাই বায় চার’ মান’।
কু্তুই চার’খায় কুতুই মা-চানায়
কাখা চার’খায় কাখা মা-চানায়
আখায় নুঙ তামা চার’নায়?
সালাইতয় কক কুতুই কুতুই নাখলখায়
তিনি তংমানি তংখরঅ
কুতুই-কাচাঙনি তয় বয়নায়;
নখাগ’ তৈ চকেলেঙ নাইথকতয়
তিনি তংখর ব’ নাইথকনায়।
মাতর অ সালাইতয়
কুতুঙ কুতুঙ, কাখা-কাফাক
ককনি হচালায় চুংগই তংখায়
তংখর তুংসিয়ই তংনায়।
তংনায়রক তংথকয়া-চাথকয়া অংগই
বাখা খামপর’জাকনায়।
আইথানি সালাইন’ কিসা সালামদি,
বাখানি কুতুইন’ ফুলই বন’
কিসা তুইরগই তনদি।
সালাই কুতুইসা অংখাইসে
নিনি তংখরব’ তুইতিনায়;
নিনি লাঙমাব’ তুইসুমনায়।
(৩১ আগস্ট ২০২০/ঢাকা)
।। নিনি-আনি চাসমায়নি কথমা।।
বরেন্দ্র লাল ত্রিপুরা
নিনি-আনি চাসমায়নি কথমা সুইজাক তংগ
ও তৈসা কাচাঙনি তৈ চিরিরিঅ;
হাপঙ কাচারনি হলঙ বেসেরতয়
ব’ নন’ রুতুগই তংগ’ সালবায়-হরবায়।
নিনি-আনি চাসমায়নি কথমা সুইজাক তংগ
মাইসিঙ সাকাঙনি সাল রিরি অংজাক নখাগ’
অবতয় বিরয় থানায় ও নাগুই তকসানি বেকারাঙগ’।
ব’ নন’ রুতুগই হাঃ কাচাল কাচাল বিরই থাংগ’
নিনি অর’ থপ লানানি বাগয়।
নিনি-আনি চাসমায়নি কথমা সুইজাক তংগ
খুমফাঙ বুলুঙগ পেরই তংনায়
ও খুমবারনি বাখাই মুতুমঅ,
বিনি বুতুই কুতুইঅ;
অর’ বঙবারাইমা বুতুই নুংনি ফাইয়’
সারি সাল কাচাঙগ' জিঙ লাগই।
নিনি-আনি চাসমায়নি কথমা সুইজাক তংগ’
ও নখা সাকানি চুমুই বিসিঙঅ;
ব’ হাঃ কাচালনি তৈজালাঙগ’ থাংগই
তৈ রুচুরই তগ’ নন’ রনানি হিনয়।
নিনি-আনি চাসমায়নি কথমা সুইজাক তংগ
নগ করেনি খুমুলুঙগ’ বলজাক সামপারি বুলুঙগ’,
নকসাচুকনি থাইপঙ বফাঙগ’ হিলয় তিসামানি
ও খেলাঙবারনি ববার বুথুব’।
অর’ ববার পেরই তাবক বাখাই কবলই তংখা,
বক সাগই তংগ’ নিনি-আনি চাসমায়নি কথমা।
(১৬-১৭ জুলাই/ঢাকা)
।। হামজাকমুঙ।।
বরেন্দ্র লাল ত্রিপুরা
আঙ হামজাকমুঙ রুতুগই মান’
ও বফাঙ বেদেক কাবায়-কুথুয়সানি অর’।
নাইদি ব বারাইখাইয়ই খামই খামই
আঙ্গারা-থাপালা অংগই বরকনি মাইতুক মুনর’
কাচাঙমাগ’ বরকন’ কুতুঙ তংর’।
আঙ হামজাকমুঙ রুতুগই মান’
তৈমা-তৈসা,তৈফর-তৈজালাঙনি অর’।
নাইদি বক সাক ফনসানি কক ওয়াসকয়া;
বরক-রুরুক, মাকমা-তকসান’ব' বক তৈ খান’;
আ-আথুক-খাঙগারাইন’ তংনাই নগ রগ’।
আঙ হামজাকমুঙ রুতুগই মান’
বলঙ-হালঙনি বফাঙ-ওয়াফাঙনি অর’।
নাইদি বক বাথাই চার’গই, বুতুই নুংর'গই
খুরিয় আচকর’গই মাথাংগই তন’ অ বলঙনি
মুইয়া-মুসুইন’, তকসা-তকমিলিরকন’।
আঙ হামজাকমুঙ রুতুগই মান’
নবারনি অর’, নখা কুচুকনি চুমুইনি অর’
ও নখানি তাল-সাল-হানদুগিরিনি অর’।
অ নবারলাই চুঙন’ হালামা রগ’,
চুমুইরক তৈজালাঙনি তৈন'
কপাল' রুচুরই তগ' জত'নি বাগই-
হাপঙ-হাথাইয়,হারুঙ-তৈফর'।
নখানি তাল চুঙন’ হর’ লাম ফুনুগ’, পহ্র রগই;
ও কাচালনি হানদুগিরি চুঙন'
হর আন্দার’আফাক রগ’;
সাইচুঙ তংমানি জরাগ’
বাখাবায় কক সাগই
বাখান’ নখায়ুঙ বেরের’গই’;
য়াকবায় বাখা মিময় ব' আন'
রাচাপমুঙ-ককলপ খানার'গ’।
(১৫ জুলাই ২০২০/ঢাকা)
--------------------------------------------------------------------------------------------------------------------।। বুইসু ।।
বরেন্দ্র লাল ত্রিপুরা
সাচালাঙনি ফুরুঙ কাচাঙগ’
নবার বায় কাচাঙ সিবই ফাইখায়
খুমতাই ববার পের’।
অ জরাগ’ চিনি হারুঙ-হাথাইনি
বুরচুক বফাঙগ’ ববার কাচাকসা বার’;
খাতুংজাগই তকসা-তকমুলুইরক
রাচাবই তংগ’।
খুমতাই ববারনি বাখাই মুতুমসা
বুরচুক বফাঙনি তকসা জাকসা
কুঙকিলানি খরাঙ কুতুইসা
তুইয়ই তগ’ বুইসুনি কক্তুমা।
বুইসু ফাইমানি কক্তুমান’ খানাগই
চিনি বাখা চাকসাগই কাগ’,
খাপাঙগ’ সারাঙমা ফায়ই
বাখা মাসাগই তংগ।
বুইসু ফাইখায় চিনি ময়াল’
খাম খরাঙ গুরুম’,
দম গুরুমই পুংসাগ’;
সুমুর-দাংদুংনি খরাঙবায়
কামি মাসাগই তংথগ’।
খাম গুরুমই গুরুমই
দম গুরুমই গুরুমই
খেরাবায় মাসানাই বু্দুল ফাইখায়
হাদুক দারিরি খাইতিয়ই
বাখা খাতুংগই কাসাগ’।
অ জরাগ’ অওয়ান বাখাই মুতুম’,
পাঞ্চন-গন্তনি বাখাই মান’,
চক-বুতুকনি বাখাইবায়
কামি কবলই তংগ’।
অ জরাগ’ কুচাই বুতুইবায় তৈ কুগই
নগ’ খুমতাঙ খাচিজাগ’
চেরকরক রি কাতাল কানই-চুমই
কামি বেরেলাইয়’।
সিকালা সিকিলিরকনি বাখাগ’
কাচাক কাখাই সুংগুইলাইয়’।
চালাইমুঙবায় নুংলাইমুঙবায়
মাসামুঙবায় রাচাপমুঙবায়
বিসি কাচামন’ বিদায় রগই
বিসি কাতালন’ রিংখন’
আমা গুংগিন’ খুম বগই।
(১০ জুলাই ২০২০/ঢাকা)
--------------------------------------------------------------------------------------------
রাঙচাকনি হাগ’ রাঙচাকনি ময়াল’
বরেন্দ্র লাল ত্রিপুরা
নক জেজাঙফুঙ থাঙলাঙদি,
আঙলাই য়াক-কারমানয়া
আনি রাঙচাকনি ইঁ ময়ালন’।
ইন’ আনি অমাথায়নি থুই কালাইজাক,
যুগাযুগি ইন’ তাংগই চামানি
আনি আচই-আচু, পূর্ব পিরিনি
য়াপাই দাগমা ইন’ আচকজাক।
আঙ হামজাগ’ অ হাপঙ-হাথাইন’
আঙ হামজাগ’ তৈমা-তৈসা,
তেরাঙ তৈকালায়নি খরাঙন’;
হলঙ বেসেরতই বইয়ই থানায়
তইসা চিরিরিনি রাচাপমুঙন’।
বরকরক জেজাঙফুঙ থাংলাঙথং,
আঙলায় পালকমানয়া
কাখারাঙ অ হুগ লাঙগিনি
খুরুই বালাইয় বিরনাই য়ংসারাইমান’,
চেঁচেঁমা, তাকথুররসানি খরাঙন’।
হামজাগ’ আঙ বলঙ মুসুইনসা পুংমানি
দেদুলুক বফাঙ তলাগ’;
বলঙ তামাসা কাতাকমানি
হাপিঙ হাকারা করেয়।
নক জেজাঙফুঙ থানজাদি
আঙলাই থানানি মুচুকয়া য়াককারই
আনি রাঙচাকনি ইঁ ময়ালন’।
ইন’ তংগজাগ’ আনি আমা বুরি
খাপাঙগ’ হামজাক্মুঙ নি বুচু চুগই।
ইন’ তংগ আনি মায়া গানাঙমা বুখুকরক,
আনি ননইরক, চালাই সাক-বাকসা আফাকরক।
বুইসু জরাগ’ইঁ ময়াল’ খাম খরাঙ পুংগ’,
সুমুর, দাঙদুঙনি খরাঙবায় খেরাবায় মাসাগ’
অওয়ান-থাইওয়াননি বাখাইবায়
বরকনি হামজাকমুঙ মুতুমবায়
ইঁ ময়াল’ বাখাসে বাঙগালা চাগই তংগ’।
মুইতুক বরবক পেংজাক,
খারুবুক বায় তখান সংজাক,
মুইতুক পাখিনি মুই রিমিল
মুইওয়া চাখুইনি মুই হিমিল
বর’ মানজানাই হায়া বিদেসি থাংখালায়।
আইথানি আঙ ইঁ ময়ালনি খুরিয় তংসিন’
থুইনাই জরা সফাইখাই ইন’
কইনেনেসা খাইয়ই থুইসিন’।
আনি থাপালা ইঁ ময়ালনি হাগ’ কালাইথং;
বিনি তৈসাগ’ কাচগই তংথং;
বিনি নবার’ কবলই থাংথং,
বিনি নখায়ুঙগ বেরেয়ই তংজাথং
ওজাঙ কিফিল’ বালই থাঙয়াসাক জরা।
আর’ ফিলই ফাইনানি সেপ মানখাই
সাচালাঙ জরাগ’ নাইফায়নাই আঙ
জিরক তকসারক চিরুগই তংজাক
ইঁ ময়ালনি বুরচুক ববার কাচাকসান’।
পান্থর গুলাচিনি ববার মুতুমন’ খুনজুর’ফেরই
মাধবি ববারনি বাখাইবায় সুম্বুর সুবই আঙ
বেরেনি ফাইনাই চিনি কামিয়’,
ইয়াকগ’ তুইতিয়ই খুমতাই ববার
আনি ববই লখিসানি বাগই।
চিনি ময়াল’ সালব্লাঙনি মল’গ’
কুঙ্কুক তকসা পুংগ’ হা বেরেয়ই,
থাইপঙ-থাইচুক মুনমানি ককন’ সাগই;
জিরক, তখারক তৈসাগ’ তৈ নুংলাইয়’;
হুগ লাঙগিনি বান কনাগ’ ওয়াঙ-দুদু চুরুইয়’,
সারিফাঙগ’ পেঁচাসা জাগুলুগ’।
নুগুল পানজারানি বফাঙ বেদেগ’
তাকথুসা চুরুইয়’ কা কুসুকর’গই।
মাইসিঙ-সাচালাঙ জরাগ’ কুঙকিলা বায়
তকসা নগারাইনি খরাঙবায় খা তংথকগ’।
বর’ থাংজানায় ইঁ ময়ালন’ য়াকারই আঙ!
অক সুপুংনি বাগই সহ্র’ সামুঙ তাংফুঙ
হাসুক হিলুকসান’ কসল বিসি কাচামনি জরাবায়
বিসি কাতালনি জরাগলাই ফাইজাগ’ আঙ
বিনি অ মুতুম কাচুরনি করেয়’,
বিনি অ তংথকনায় খুরিনি পানজারাগ’
কইনেনেসা খাইয়ই।
মা বায় সা নি লাঙমা কুসুঙসানি বথলন’ মচগই
থাংযা আঙ হায়া বিদেসি।
লাঙমা কুসুঙসান’ হরাইর’নাই ইঁ হাগ’;
অমাথায়নি থুই কালাইজাক,
আচই-আচুনি খরাঙ কবলজাক,
বকনি য়াপাইনি দাগমা কালাইজা্ক,
মাইসিং সিয়ারই খুজাক,
ওজিয়ই ফাইনায় ইঁ হাগ’।
(৮-৯ জুলাই ২০২০/ঢাকা)
----------------------------------------------------------------------------------------------------------------------
Borendra Lal Tripura
Hortara Twijak Boroksa-
The Man with the Magic Lamp
by Borendra Lal Tripura
হরতারা তুইজাক বরকসা
বরেন্দ্র লাল ত্রিপুরা মকল কিয়কয়া খুনজুর খানায়া, সাল আন্ধারনি যুগ-অ নুং আচাইফাইখা চিনি ময়াল-অ; য়াক-অ হরতারা তুইয়ই। সুরুংরেমন' সুরুংতই সুরুংতই, রুংরেম-ন রুতুকতই রুতুকতই নিনি মকল-খুনজুর কিয়ক-খা; য়াগ-অ হরতারা চুংখা ।অ হরতারা-ন তুইয়ই নুং কামি খরসিনি বালখা; ময়াল খরসিনি লে-খা।
নিনি ফুরুংরেমনি হচালাইবায়, নিনি রুংরেম-নি পহ্রবায় মকল নুংয়ারক নুংসাকা, খুনজুর খানায়ারক খানাসাখা। হাপং-হাথায়, তৈফর তৈসা, বলং-হালং গানাং সিয়ারি খুঃজাক চিনি ই ময়াল, লাং লাং অংসাগই ফাইকা। আইথানি-অ বরক-রক ব-ন “হেড মাস্টর” হিনয় মুং চংখা।
চিচুকু শ নুইচিচার বিসিনি এপ্রিল তালনি পইলা-গ আচাইয়ই
বিসি স্নিচিচার আয়ুক লাগই বিসি হাজার নুইচিস্নিনি ফেব্রুয়ারি তালনি চিচুকু সাল-অ নুং হায়ুংমা-ন য়াককারই থাংখা।
নিনি সামুংনি হচালাই কুচুং, নি তাংমুংনি পহর কুচুং
মুং চুংরগই তনখা নিনি- চিনি খাপাংনি কাচার-অ;
বাখাই সাওয়ারই তংখা নিনি চিনি ময়ালনি হাপার-অ। ৪ ফেব্রুয়ারি ২০১৭ ----------------------------------------------------------------------------------------------Bengali Translation below:
________________________________________
shera
ReplyDelete